Janeiru 2011: Hametin Seguransa TL-Australia

Hametin Seguransa TL – Australia

“Ministru Interior Australia Hasoru Malu ho Lideransa FRETILIN”

Dili-Molok tinan 2010 husik hela ita, FRETILIN hanesan Partidu historiku ne’ebé bo,ot iha Timor - Leste  no kualidade hanesan opozisaun ba Governu defaktu AMP dala ida tan simu vizita husi “Ministru Interior Australia nian Brendan O”Connar ho ninia Delegasaun mai hasoru lideransa FRETILIN nian hodi  husu opiniaun kona ba oinsa dezenvolve Polisia Nasional Timor Leste ( PNTL) no Servisu hamutuk hodi asegura seguransa rai rua nian. Ne,e hatudu katak sira rekoinese kualidade lideranca FRETILIN ninia, no FRETILIN ninia kontribuisaun ba hametin Paz no Estabilidade iha Timor—Leste

“Nia ( Brendan ) mai halo avaliasaun kona ba nivel kooperasaun ne’e, konaba seguransa nian,” dehan Sekretariu Jeral Partidu FRETILIN Dr. Marí Alkatiri, iha loron 14 Dezembru 2010  iha CCF Komoro.

Dr. Mari Alkatiri dehan, enkontru refere positivu tanba nasaun vizinú Australia hatudu vontade nafatin atu bele dezenvolve ita  nia PNTL sai Polisia ida ne’ebé mak professional no iha integridade.

“Positivu tanba iha nafatin vontade para halao kooperasaun ba oin, sira (Australia) iha vontade nafatin atu hadia ita nia instituisaun Polisia,”dehan Alkatiri.

Eis Primeiru Ministru ne’e hatutan, TL Presiza servisu hamutuk ho Australia iha area seguransa nian hodi hare ba seguransa ne’ebe bele ameasa rai rua ne’e, hanesan trafiku umanu, money laundry ( Fase Osan), droga(aimoruk at nebe halo ema kontente hela deit ) no krimi organizadu seluk.

Entertantu Ministru Interior Australia Brendan O”Connor hateten, objetivu vizita ne’e atu halo avaliasaun ba kooperasaun Australia no TL iha area seguransa, oinsa Australia kontinua hasae kapasidade PNTL nian iha futuru.

Maske nia rasik rekonese, kapasidade no profesionalizmu PNTL nian forte ona, maibe Ministru Interior ne’e dehan Australia iha komitmentu nafatin atu tulun TL iha area dezenvolvimentu no kapasitasaun ba PNTL.

“Ita bele konsidera katak, Timor Leste forte tiha ona, iha area polisia nian no kontinua mantein atu dezenvolve Polisia Timor Leste atu bele ba servisu hamutuk iha area seguransa nian iha futuru,”dehan Brendan.

Deputadu José Teixeira

Iha oportunidade ne’e deputadu Jose Teixeira bankada FRETILIN mos partisipa iha  sorumutu ne’e, nudar deputadu komisaun B ne’ebe trata asuntu Defeza no Seguransa no Relasaun Externa deputadu, José Teixeira hatete mos katak, importante duni atu Timor Leste presiza kontinua halo kooperasaun hodi hasae kapasidade PNTL ho professionalismu atu bele garante seguransa interna Timor Leste.

“Ita presiza tanba ita hakarak ita nia Polisia Nasional Timor Leste (PNTL) sai Polisia ida ne’ebe professional,”dehan membru komisaun B ne’e.Iha sorumutu ne,e partisipa mos Membru Parlamentu Bankada FRETILIN balu, Membru CPN, no 1° SGA Jose Reis.