sexta-feira, 18 de fevereiro de 2011

Hametin Estrutura Baze - Bano: "FRETILIN Iha Fatin Hotu-hotu”







Hametin Estrutura Baze


Bano: "FRETILIN Iha Fatin Hotu-hotu”

Dili-“Maromak iha fatin hotu-hotu inklui mos FRETILIN iha fatin hotu” haktuir Vice Presidente FRETILIN Arseino Bano iha tomada de pose ba estrutura joventude FRETILIN iha Sub-Distritu Uato-Carbau Distritu Viqueque, Sabado (04/12).

Nia dehan dadaun ne’e iha teritoriu tomak TL komesa husi Aldeia to’o Distritu no Nasional FRETILIN forma hotu nia estrutura ne’ebé nia intensaun atu hala’o programa no politika partidu nian atu dezenvolve nasaun no povu Timor Leste.

“Iha Timor Leste tomak iha Aldeia 2.228 ne’e estrutura FRETILIN monta hotu ona, ne’e signifika katak FRETILIN iha fatin hotu-hotu,”dehan Arsenio Bano Atual Deputadu PN husi Bancada FRETILIN.
Ho situasaun ne’e liga ba prosesu governasaun AMP ne’ebé konsidera nakonu ho korupsaun no oportunista nune’e konsekuensia povu kontinua moris kiak, FRETILIN iha nia prinsipiu kedas katak, hafoin Liberta Nasaun Liberta Povu, Nasaun Liberta tiha ona agora FRETILIN sei A luta Kontinua atu liberta tan povu maubere husi kiak, no beik.

“FRETILIN iha responsablidade boot atu liberta tan povu maubere husi kiak, beik ne’e responsablidade FRETILIN nian la’os oportunista nian,” deklara nia.

Tan ne’e vice Presidente FRETILIN ne’e apela ba estrutura tomak liu-liu juventude atu esforsu maka’as luta kontra kiak no mukit.

Tanba tuir Bano katak agora dadaun Governu AMP ukun ho osan boot maibe la halo dezenvolvimentu ba povu no nasaun.

“AMP fakar deit osan maibe la halo buat ida, hanesan irigasaun Bebui no projeitu sira seluk, ohin halo aban at, nune’e deit,”lamenta nia.

Bano reforsa katak, ba oin esperansa FRETILIN mak tenki ukun to’o jerasaun ba jerasaun atu mantein integridade no dezenvolvimentu ba povu no nasaun Timor –Leste.

Entertantu iha okaziaun ne’e responsavel joventude eleitu sub-distritu Uatu-carbau Calistro da Costa hateten nia parte hamutuk ho membru estrutura tomak inklui militante hotu kontinua esforsu atu servi partidu hodi luta hasoru kiak ne’ebe povu infrenta.

“Serviso sempre todan maibe esforsu hamutuk ho lideransa tomak iha Nasional, Fretilin sei hetan vitoria,”deklara nia.

Sem comentários:

Enviar um comentário